हत्याका आरोपी वडाध्यक्ष ‘नाटकीय रूपमा’ दुई लाख धरौटीमा रिहा उही मुद्दामा पक्राउ परेका दुईजना भने पुर्पक्षका लागि जेलमा

राजनीति समाचार

हत्याका आरोपी वडाध्यक्ष ‘नाटकीय रूपमा’ दुई लाख धरौटीमा जिल्ला अदालत रौतहटबाट छुटेका छन् । तर, सोही मुद्दाका अन्य दुई आरोपी भने पुर्पक्षका लागि जेलमा छन् ।

६२ वर्षीय श्रीराम साह हत्याका मुख्य आरोपी शेख नरुल्ला दुई लाख रुपैयाँ धरौटीमा छुटेका हुन् । नरुल्ला रौतहटस्थित देवाही–गोनाही– १ का वडाध्यक्ष हुन् । साह रौतहट माधवनारायाण– २ स्थित हनुमान मन्दिरका पुजारी थिए । उनीहरूबीच राम्रो सम्बन्ध थिएन ।

प्रहरीका अनुसार नरुल्लाले शुक्रबार साँझ साढे ५ बजे अदालतमा आत्मसमर्पण गरेका थिए । वकिलसहित अदालत पुगेका उनको तत्कालै वकपत्र भएको थियो । सोही वकपत्रका आधारमा न्यायाधीशले शुक्रबार नै दुई लाख रुपैयाँ धरौटीमा छाड्ने आदेश दिएका हुन् । अदालत सोही मुद्दाका लागि शुक्रबार बेलुकासम्म खुलेको थियो ।

जिल्ला सरकारी वकिलको कार्यालय रौतहटका प्रमुख सुवास भट्टराईले अदालतको आदेशमा दुई लाख रुपैयाँ धरौटी पेस गरेपछि नरुल्ला छुटेको बताए । उनले भने, ‘नरुल्ला शुक्रबार अदालतमा हाजिर भए र बहस पनि चल्यो । सोही आधारमा न्यायाधीशले दुई लाख रुपैयाँ धरौटीमा छाड्ने आदेश दिए । कागजात हेरेर हामी आइतबार पुनरावेदनका लागि उच्च अदालत जाने मनस्थितिमा छौँ ।’

तर, एउटै मुद्दामा पक्राउ परेका देवाही–गोनाही– १ करुनियाका ३६ वर्षीय नरेश भनिने रामनरेश राउत पटेल र २८ वर्षीय बालकुमार पटेल भने पुर्पक्षका लागि जेलमा छन् । हत्या भएको केही दिनपछि उनीहरूलाई प्रहरीले भारतको बिहारबाट पक्राउ गरेर ल्याएको थियो । हत्याका मुख्य आरोपी नरुल्ला भने फरार थिए । साहको ३ भदौ ०७७ बेलुका ९ बजे मन्दिरमै गोली हानी हत्या भएको थियो ।

फौजदारी कसुरमा बहस हुँदा पीडित पक्षलाई अनिवार्य अदालतमा हजिर गराउने कानुनी व्यवस्था छ । तर, पुजारी हत्याका मुख्य आरोपी मानिएका नरुल्ला अदालतमा हाजिर भई वकपत्र हुँदासमेत पीडित पक्षलाई खबर गरिएन ।

जिल्ला सरकारी वकिलको कार्यालय रौतहटले हत्या गरिएका पुजारी साहको परिवारमा कोही नभएकाले खबर नगरिएको जनकारी दिएको छ । निःसन्तान साहका परिवारमा दाजुभाइ रहेका छन् । उनीहरूकै जाहेरीका आधारमा प्रहरीले मुद्दा अघि बढाएको थियो ।

तत्कालीन समाजवादी पार्टीबाट वडाध्यक्षमा निर्वाचित नरुल्ला हत्यापछि प्रहरीको खोजी सूचीमा थिए । वर्ष दिनसम्म लुक्दै आएका उनले शुक्रबार अचानक अदालतमा आत्मसमर्पण गरेको रौतहट प्रहरी प्रमुख एसपी सिद्धिविक्रम शाहले बताए ।

उनले भने, ‘पुजारी हत्यालगत्तै नरुल्ला फरार थिए । प्रहरीले खोजी जारी राखेको थियो । उनी शुक्रबार एकाएक अदालतमा देखिए र सोही क्रममा आत्मसमर्पण पनि गरे । उनको शुक्रबार नै वकपत्र भएर दुई लाख रुपैयाँ धरौटीमा छाड्ने आदेश भएपछि रिहा भए ।’ नरुल्ला जसपाका स्थानीय नेता हुन् । उनको सोही वडास्थित करुनियामा घर छ ।

अचानक अदालतमा आत्मसमर्पण, तुरुन्तै रिहा
हत्याका मुख्य आरोपी देवाही–गोनाही– १ का वडाध्यक्ष शेख नरुल्ला एक वर्षदेखि फरार थिए । तर, शुक्रबार नाटकीय रूपमा जिल्ला अदालतमा आत्मसमर्पण गरे र त्यसै दिन अदालतले उनलाई दुई लाख धरौटीमा छाड्न आदेश दियो । तर, एउटै मुद्दामा पक्राउ परेका देवाही–गोनाही– १ करुनियाका ३६ वर्षीय नरेश भनिने रामनरेश राउत पटेल र २८ वर्षीय बालकुमार पटेल भने पुर्पक्षका लागि जेलमा छन् ।

जिल्ला सरकारी वकिलको कार्यालय रौतहटका प्रमुख सुवास भट्टराई भन्छन्, ‘नरुल्ला शुक्रबार अदालतमा हाजिर भए र बहस पनि चल्यो । न्यायाधीशले दुई लाख धरौटीमा छाड्ने आदेश दिए । कागजात हेरेर हामी आइतबार पुनरावेदनका लागि उच्च अदालत जाने तयारीमा छौँ ।’

Leave a Reply

Your email address will not be published. Required fields are marked *