ज्योतिषले पनि राजीनामा दिन भन्नुभयो, त्यसैले राजीनामा दिन लागेको हुँ : मन्त्री हमाल

राजनीति

काठमाडौं, २४ असोज । नवनियुक्त उद्योग, वाणिज्य तथा आपूर्तिमन्त्री गजेन्द्र बहादुर हमालले पदबाट आजै राजीनामा दिने भएका हुन् । यसको लागि उनी अहिले १० बजे प्रधानमन्त्री शेरबहादुर देउवालाई भेट्न बालुवाटार जाँदैछन् ।

आफू मन्त्री भएपछि प्रधानन्यायाधीश चोलेन्द्र शमशेर जबरा र न्यायालयमाथि नै प्रहार गर्न थालिएकोमा असन्तुष्टि पोख्दै हमालले पदबाट राजीनामा दिन लागेका हुन् । पत्रकार ऋषि धमलालाई विहानै फोन गरेर हमालले आजै राजीनामा दिने घोषण गरेका थिए । आफूले कांग्रेसमा चार दशकभन्दा लामो समय सक्रिय राजनीति गरेको उनको भनाई छ ।

किन राजीनामा दिन बाध्य भए हमाल ?

तर, पार्टीमा आफूले पुर्याएको योगदानको चर्चा नभएको र नाता परेकै कारण प्रधानन्यायाधिश जबरालाई मुछेर आलोचना भएकोमा उनी असन्तुष्ट छन् । धमलासँगको कुराकानीमा उनले आफूलाई ज्योतिषले पनि राजीनामा दिन सुझाएको खुलाए । उनले भने,”मेरो गरुले पनि मलाई राजीनामा दिँदा नै उपयुक्त हुन्छ भन्नुभयो, त्यसैले राजीनामा दिन लागेको हुँ ।”

मन्त्री हमालद्वारा राजीनामाको घोषणा

काठमाडौं, २४ असोज । उद्योग, वाणिज्य तथा आपूर्तिमन्त्री गजेन्द्र हमालले राजीनामाको घोषणा गरेका छन् । रिपोर्टर्स नेपालका लागि ऋषि धमलासँग कुरा गर्दै उनले राजीनामाको घोषणा गरेका हुन् ।

‘मैंले राजीनामाको घोषणा गरें,’ मन्त्री हमालले भने, ‘प्रधानमन्त्रीज्यूसँग भेटेर राजीनामा बुझाउँदैछु ।’ उनले आफू पदका लागि राजनीति नगरेको बताए । लामो समय नेपाली काँग्रेसमा रहेर राजनीति गरेको उल्लेख गर्दै भने, ‘मैंले पदका लागि राजनीति गरिनँ र गर्ने पनि छैन ।’ आफू लो प्रोफाइलमा बसेर मोफसलमै सक्रिय रहेको स्पष्ट पारे ।

मन्त्री हमालले आफ्नो नियुक्तिमा प्रधानन्यायधीश चोलेन्द्र शमशेर जबराको कुनै भूमिका नरहेको बताए । नियुक्तिमा प्रधानन्यायाधीशलाई मुछ्नुले आफू आश्चर्यचकित भएको बताए । प्रधानमन्त्री शेरबहादुर देउवाले आफ्नो लामो राजनीतिक सक्रियतालाई दृष्टिगत गरी नियुक्त गरेको ठानेको र आफूलाई त्यसबारे थाहा पनि नभएको बताए । उनले भने, ‘मलाई मन्त्री बन्दैछु भन्ने पनि थाहाथिएन ।’

प्रधानन्यायाधीश जबराका नातेदार हमाललाई उनकै चाहना बमोजिम नियुक्ति दिएको भन्दै विभिन्न क्षेत्रबाट आलोचना भएपछि हमालले राजीनामाको घोषणा गरेका हुन् ।

२२ असोजमा मन्त्री नियुक्त भएका हमालले तीन दिनमै राजीनामा घोषणा गर्नुलाई अर्थपूर्ण मानिएको छ । प्रधानमन्त्री देउवाले झण्डै तीन महिना लगाएर मन्त्रिपरिषदलाई पूर्णता दिदा हमालले महत्वपूर्ण मन्त्रालयको जम्मेवारी पाएका थिए । उनी देउवा सरकारमा राजीनामा घोषणा गर्ने पहिलो मन्त्री भएका छन् ।

Leave a Reply

Your email address will not be published. Required fields are marked *